ابو سعید خدری (رض) کہتے ہیں کہ ابوموسیٰ اشعری (رض) نے عمر (رض) سے ان کے پاس حاضر ہونے کی اجازت طلب کی تو انہوں نے کہا :«السلام عليكم» کیا میں اندر آسکتا ہوں ؟ عمر (رض) نے (دل میں) کہا : ابھی تو ایک بار اجازت طلب کی ہے، تھوڑی دیر خاموش رہ کر پھر انہوں نے کہا : «السلام عليكم» کیا میں اندر آسکتا ہوں ؟ عمر (رض) نے (دل میں) کہا : ابھی تو دو ہی بار اجازت طلب کی ہے۔ تھوڑی دیر (مزید) خاموش رہ کر انہوں نے پھر کہا : «السلام عليكم» کیا مجھے اندر داخل ہونے کی اجازت ہے ؟ عمر (رض) نے (دل میں کہا) تین بار اجازت طلب کرچکے، پھر ابوموسیٰ اشعری (رض) واپس ہو لیے، عمر (رض) نے دربان سے کہا : ابوموسیٰ نے کیا کیا ؟ اس نے کہا : لوٹ گئے۔ عمر (رض) نے کہا انہیں بلا کر میرے پاس لاؤ، پھر جب وہ ان کے پاس آئے تو عمر (رض) نے کہا : یہ آپ نے کیا کیا ہے ؟ انہوں نے کہا : میں نے سنت پر عمل کیا ہے، عمر (رض) نے کہا سنت پر ؟ قسم اللہ کی ! تمہیں اس کے سنت ہونے پر دلیل و ثبوت پیش کرنا ہوگا ورنہ میں تمہارے ساتھ سخت برتاؤ کروں گا۔ ابو سعید خدری کہتے ہیں : پھر وہ ہمارے پاس آئے، اس وقت ہم انصار کی ایک جماعت کے ساتھ تھے۔ ابوموسیٰ اشعری نے کہا : اے انصار کی جماعت ! کیا تم رسول اللہ ﷺ کی حدیث کو دوسرے لوگوں سے زیادہ جاننے والے نہیں ہو، کیا رسول اللہ ﷺ نے یہ نہیں فرمایا : «الاستئذان ثلاث» (اجازت طلبی) تین بار ہے۔ اگر تمہیں اجازت دے دی جائے تو گھر میں جاؤ اور اگر اجازت نہ دی جائے تو لوٹ جاؤ؟ (یہ سن کر) لوگ ان سے ہنسی مذاق کرنے لگے، ابو سعید خدری کہتے ہیں : میں نے اپنا سر ابوموسیٰ اشعری کی طرف اونچا کر کے کہا : اس سلسلے میں جو بھی سزا آپ کو ملے گی میں اس میں حصہ دار ہوں گا، راوی کہتے ہیں : پھر وہ (ابوسعید) عمر (رض) کے پاس آئے، اور ان کو اس حدیث کی خبر دی، عمر نے کہا : مجھے اس حدیث کا علم نہیں تھا ١ ؎۔

امام ترمذی کہتے ہیں : ١ - یہ حدیث حسن صحیح ہے، اور جریری کا نام سعید بن ایاس ہے اور ان کی کنیت ابومسعود ہے۔ یہ حدیث ان کے سوا اور لوگوں نے بھی ابونضرہ سے روایت کی ہے، اور ابونضرہ عبدی کا نام منذر بن مالک بن قطعہ ہے، ٢ - اس باب میں علی اور سعد کی آزاد کردہ لونڈی (رض) سے بھی احادیث آئی ہیں۔

تخریج دارالدعوہ : صحیح مسلم/الآداب ٧ (٢١٥٣) (تحفة الأشراف : ٤٣٣٠) (صحیح )

وضاحت : ١ ؎ : اس سے معلوم ہوا کہ بسا اوقات ایک ادنی شخص کو علم دین کی وہ بات معلوم ہوسکتی ہے جو کسی بڑے صاحب علم کو معلوم نہیں ، چناچہ عمر (رض) کو یہ نہیں معلوم تھا کہ تین بار اجازت طلب کرنے پر اگر اجازت نہ ملے تو لوٹ جانا چاہیئے۔

قال الشيخ الألباني : صحيح

صحيح وضعيف سنن الترمذي الألباني : حديث نمبر 2690

Jami at-Tirmidhi

Jami at-Tirmidhi